Logo berkelnieuws.nl


Foto: Majorie Nijbroek

Column Marcel Stroet: De maiskearls

  Column

Tuf ik doar op de binnenweg van Hoarle noar `t Slat kom ik achter zonne onwiezen maiskoare te zitten. Op zo`n moment kun ie niks anders dan rustig blieven en der hendig achter blieven. Ik heb vrogger noast `n loonwarker e woont dus ik wet precies wat veur gemas dat is. De kearls maakt lange daage en korte nachte. Iederen boer wil den mais der meteen of hemmen. As den loonwarker `t te lange duur`n veurdat de earste boer`n belden dan reed he alvas ne keare met de maiswagens deur `t boetengebied. As de boer`n dat dan zoog`n greppen ze noar de telefoon en dan konden de maiskearls deran.

Vrogger en misschien noe ok nog wal was `t `n hele strijd tussen boer`n van 'weurumme kneus ie earst doar en neet bie mien?'. Het oaverdrieven zat de boer`n in `t blood. Zo waren de maiskearls ne keare redelijk vrog kloar en zeiden wij kunt der nog wal `n stukske bie doon vandaage. De loonwarker belden `n boertje in de buurte um te vroagen hoevulle scheppe zoad he had stoan en of ze der dat in een paar uur der of konden kriegen. Den boer zeg: 'Een paar uur? Bie mien bun ie minstens een dag of twee drok'. De kearls beslotten um noar berre te goan en den anderen morgen der op tied hen te goan.

Veur dag en dauw kwammen ze bie `t boertje an den nog op één oor lag. Ze begonnen te kneuzen en met een good uur was `t kloar. Met toen de kearls vot wollen kwam `t boertje deran um ze ne snoette koffie te doon. Met `n hoop bombarie zei hee: Goh kearls wat mooi dat jullie vannach bunt deur e goane um mien land te hakselen en dat jullie dat zo hendig heb e doane ik heb niks vernommen.

reageer als eerste
Meer berichten