Logo berkelnieuws.nl


Foto: Majorie Nijbroek

Column Marcel Stroet: Deur de piepe

  Column

Vergangen wekke was `t zowiet: `t nieuwe crematorium heelt open huus. Ik kreg doar `n betje rare gedachten bie. Ik dach wie zal `t zich in de kop haal`n um doar te goan kieken? Dat is toch wal `t leste woar ie ooit an denkt. Ik had de krante good noa e kekken of ze misschien nog vriewilligers zochten dee der as eaerste deur wollen. Op dee oproep had gin mense reageerd, ik denk dat menigeen dat te heitte onder de veute zol wodden.

Op den open dag kwammen doezenden belangstellenden. Onveurstelboar wat `n bult volk. Of zoas de eigenaar zol denken: 'wat `n bult toekomstige klanten'. As ieder deur de piepe geet ooit, mot wij `t gezegde, he dreit zich umme in `t graf moar afschaffen. Misschien mot dat wal wodden as der iets biezonders gebeurt: as opa dat heurt wordt de urn te klein.

Zo was der vrogger bie ons in de buurte altied `n old kearltje den dagelijks deur `t darp hen fietsten op `n dreewieler, he had altied ne piepe an. Ne keare heurden ikke van leu dat ze zeiden; de piepe is hum oet e goane. ik was nog moar zonne jonge en zag `t probleem neet. Wal veel mien op dat ik hum later nooit mear e zeene heb.

Ik heurden van leu dee op de open dag wazzen e wes dat `t allemoal herbroekt werd. Het was der biezonder milieuvrendelijk. Ok de hette van ons gebeuren werd wear gebroekt um te stokken en ie konden boeten niks roeken. Noe kunt ze dat wal zeggen, moar der werd den dag neet e stokt. En as ik wat leu soms roek dan kan ik mien neet veurstellen dat dee de loch kwiet zult wodden.

Moar good `t zal wal woar wean allemoal. Onlangs vroog der mien nog eene wat ik later wol deur de piepe hen of de grond in. Ik zei hum de grond in graag; ik stoa mien hele leaven al veur de oaven en dan zol ik der op `t leste ok nog inkroepen. Moar loat wij hoppen dat dat veur ons allen nog `n tiedje duurt.

reageer als eerste
Meer berichten
CustomHtml_1