Foto: Majorie Nijbroek

Column: Crematorium

Kiek dat is nog eens een mooi woord um met scrabble oet te leggen, dan kan de rest meteen de steentjes vot doon en heb ie e wonnen. Den processierups den blif de gelederen moar bezig hollen. Ik vroag lest nog an een paar man wat veur vlinder wurdt dee rupse eigenlijk?

Gin mense kon der 'n zinnig antwoord op geven. Het is ne soort nachtvlinder ok nog neet fraai um te zeen in de volksmond neum wij ze wal motten. Noe zatten de verdelgers met een groot probleem ,gin enkel avalverwarkingsbedrief wol dee dinge verwarken.

De heure van dee rupse kunt nog joaren veur jukke zurgen. Noe is der `n dieren crematorium den de oplossing hef e vonden de rupsen verbranden in de crematorium oaven. Mien fantasie ging natuurlijk meteen op hol. Ik zag al allemoale kleine kistjes stoan en kleine bleumkes op `t kistje. Ne sprekker derbie en dan noatied `n klein kupke koffie met `n klein plekske cake. In kleine urntjes kun ie ze dan metnemmen as herinnering an de jukke. Zon urntje zet ie dan op den bozem en as ie der noar kiekt zul ie vaste wear jukke kriegen.

Zo was ik ne keare op visite bie leu dee nogal ruw konden proaten. De vrouwe was een heel bes mense van roem tweehonderd pond en neet vulle groter as ne rasterpoal. Den man van heur was ok al zonne mop van ne kearl en den schreeuwen nogal as he an de proat was. Met hande en veute zetten he ziene weurde krach bie. Zo vertellen he dat ze dit joar onwies grote knollen hadden, he strekken zien arm vol oet en sloog `n stenen pot van de heard of.

De vrouwe kik verschrikt op en zeg: potdimme noe heb ie mien Mooder ok nog an stukken e slagen. De kearl kik efkes en zeg: dan mot ie dat mense mor neet zo kort bie de heard zetten. Later boeten zeg de kearl: potdimme earder zat mien schoonmoo ok altied al op de beste plaatse.

Stefan Wegdam
Meer berichten